الجيل كله بايظ

شوفوا يا شباب ويا بنات

الناس دى ظلمانا فى كل مكان تسمع نفس الكلمه

حتى جوه المدارس

" الجيل كله بايظ "

بنتعلم فى مناهج من ايام الفراعنه كلها معتمده على الحفظ او اغلبها ع الاقل

وفيه ناس غيرنا دلوقتى الطالب بيستخدم احدث الادوات

والكهربا والمعامل ويخترع بايده نموذج

واحنا حصص الصيانه والرسم والالعاب كله بيضيع

وملوش قيمه ولا ادوات ومدرسينه بيعاملونا على اننا مبنفهمش

بيعلمونا ان من حقنا نعبر عن راينا بكل ديموقراطيه ويعملو لنا انتخابات

ويوم ما نقول راينا فى مدرس او اسلوبه نبقى مش متربيين ومش كويسين

ولو فكرت انزل مظاهره ولا حاجه يبقى الامن حوالينا فى كل مكان

ويبقى خطر انى انزل اعبر عن رايى فى كل سلم وانا لا بطول لسانى ولا بعمل غلط

لو كنت صحفى وكتبت راى يبقى اترفد من مكانى عشان بقول الحق

اللى قبلنا كانو طيبين اوى

سابو حقهم يضيع وضيعوا القدس

من ايدينا ومطلوب اننا نرجعها

علمونا فى المدرسه اللى الاستاذ يقوله يبقى صح حتى لو كان غلط

لو شوفت غلط اسكت لتاذى

بيعلمونا السلبيه وبيطالبونا نكون اجابيين

مطالبين نغير الواقع

ادونا بلد ليها تاريخ عريق وحضاره وهما سكتوا عليها وهى بتتهان وبتتضرب

الفتره اللى فاتت ودلوقتى مطالبين اننا نرجع الصورة بيضا زى ما كانت

زى ما هى مكتوبه فى التاريخ وفى اكتوبر وفى ثوره يوليو

طب ازاى قدامنا سنين وسنين

عاوزينا نبقى دكاتره نقعد نزاكر سنين طويله

وفى الاخر نطلع نقعد ع القهاوى

طب ايه لزمتها من الاول ؟

واحنا وسط كل ده عايشين

عقلنا كبير بنفكر بدماغ ناس اكبر مننا

بس هما اللى مش فاهمين

احنا افضل الاجيال بنحارب فى كل اتجاه عشان نكمل

بنعوم فى مركب غرقان وبنكمل عوم

وعشان فيه قله بتسيىء لينا فهى موجوده فى كل جيل

حتى لو كانت باينه عندنا كتير بس احنا مش باظين

فيه اكتر منها كويس

ولو كنا بايظين فعلا

طب ما تصلحونا ؟ عيشونا فى جو سليم

خلونا نحس ان اللى بنتعلمه صح ؟ خلونا نقول راينا

يلا اعملوا مقارنه وقولوا ؟

احنا مين وهما مين ؟

مين فينا اللى بايظ ؟