هذه سطورى اهداء الى كل من ساهم فى الاحتجاج على ملحمه التعذيب ولو بأضعف الايمان
................................
اتكسيتى بالسواد يا حبيبتى طول نيلك
الكل شال حزنه وهمومه وجاه لحدك يشتكيلك
زعلان عليكى يا حبيبتى ومنك انتى
ندمان بيقول الفين خساره عل حالك
---------
اتكسيتى بالسواد يا حبيبتى عاللى راح
دم خالد ولا صابر ولا حماده وصلاح
كله جا لحد عندك جاور الاله بتاح
يسالك ليه يا حبيبتى ايه جرالك
--------
اتكسيتى يا حبيبتى بالسواد عشان بناتك
منهم اتنين شالوا مصحف حلفوا ليكى وبحياتك
حاوطوهم العساكر بالسلاح والعصا والمدافع والخناجر والبنادق
ما تقوليلى يا حبيبتى سايقه علينا ليه دلالك
------
اتكسيتى يا حبيبتى بالسواد من اسوان لاسكندريه
الكل راح ساعه غروب يستنى طلعتك البهيه
يودع شمس المغربيه شمس قهر وشمس ذل
يدعى بفوقتك القويه
-------
يمكن تفوقى مع القمر ولا الغضب ينسف ظلامك
اتكسيتى بالسواد يا حبيبتى وراح سلامك
اتكسيتى بالسواد سواد عشاق داقوا المرار
جم اليكى واقسموا يفكوا عنك احصار
صدقيهم يا حبيبتى بكره يكسوكى عمار
بكره قوه صمتهم تقتل الطغيان بالنار
صدقيهم يا حبيبتى بكره يجوا يفرحوكى
ويقولوا لك جبنا ليكى 80 مليون انتصار
هناك 4 تعليقات:
جميله جدا يا سلسبيل
فيها ابيات رائعه
بس سؤال هى جم دى من اللغه العربيه؟؟ :D
بعض ما عندكم
ايوة اعترض بقى اهو كده وان كان عاجب
بجد انتي حد رائع مش عارف اقولك ايه لكن بجد مؤثرة وحلوة خالص ... انتي حد عنده موهبة جميله جداً بيقدر يعبر بيها عن فيضان من المشاعر المحيطه بيه
، فعلاً اعجابي بيكي بيزداد يوم بعد يوم
اشكرك ع المرور واتمنى اعرف انت مين بقى لو احنا نعرف بعض شخصيا
إرسال تعليق